تراختور
تراختور کولتورل و ایدمان تاخیمی و یا تراختور تاخیمی (فارسجا: باشگاه فرهنگی ورزشی تراکتورسازی تبریز) ساده‌جه تراختور ، تیراختور و تیرختور تبریزین، ایران فوتبال سوپئرلیگینده(جام خلیج فارس) ایشتیراک ائدن فوتبال تاخیمی‌دیر. بۇ تاخیم ۱۹۷۰-جی میلادی ایلینده و ۱۳۴۹-جو شمسی ایلینده قورولموش‌دور. تاخیمین حامی‌سی ایران‌نین بؤیوک اؤره‌تیم ائولریندن بیری اوْلان و تبریزده یئر‌لشن تراختور تؤره‌ین اؤره‌تیم ائوی‌دیر. بۇ تاخیم ایران و دونیا فوتبالونا بؤیوک اویونچولار وئرمیشدیر.
تراختور تاخیمی ۱۳۸۰-۱۳۸۱ ایللره‌جن ایرانین سوپئرلیگینده توپ اوْیناییردی، آنجاق او ایلدن آشاغا دسته‌یه دوشوب و ۷ ایل گؤزلمکدن سوْنرا ۱۳۸۸-جی ایلینده یئنیدن ایرانین سوپئرلیگینه قاییتدی. تراختور ۱۳۹۰-۱۳۹۱-جی ایلینده لیگده ایکینجی تاکیم(نائب قهرمان)چیخاراق آسیا قهرمانلار لیگینه یول تاپدی.
آد
تاخیم اؤز آدینی اونون رسمی حامی‌سی تبریزین تراختور تؤره‌ین اؤره‌تیم ائوی آدیندان گؤتورموشدور. (اینگیلیسجه: tractor) سؤزجوگون ایران تؤرکلری "تراختور" یا "تیره‌ختور" دئییرلر. بونا گؤره یانداشلار اؤز سئویملی تاخیملارینی یالنیز تۆرکجه آلقیش‌لاییرلار. یانداشلار تاخیمین آدین تراختور یازما ایسته‌ییرلر و کؤینکلر و بایراق‌لارینا تراختور یازیرلار، آنجاق بیر سیرا واختلار خ یازیلی بایراق‌لار و کؤینک‌لری‌له استادیومون ایچینه گئتمه‌یه یول وئرمیرلر.
ایران ایسلام اینقیلابی‌ندان اؤنجه
تراختور ۱۳۵۴-جی ایلینده جام-ی تخت-ی جمشیده صعود ائتدی. او ایل تراختور
۱۶ کوماندانین ایچینده ۱۶-اینجی اوْلوب سقوط ائتدی. اونلار بیرایلدن
سوْنرا، ۱۹۷۸-اینجی(میلادی)ایلده (۱۳۵۷ ه.ش)، یئنی دن ایرانین
سوپئرلیگینده ایشتیراک ائتدی‌لر و بئشینجی اوْلدولار. بۇ ایللرده
تراختورون باش مشقچی‌سی حوسئین فیکری ایدی و اویون‌چولاردان پرویز مظلومی،
عابباس کارگر، ایبراهیم کیان طهماسوبی و... بۇ کوماندادا اوْیناییردیلار .تراختور
۱۹۷۹–اینجی ایلده‌ده (۱۳۵۷ه.ش) سوپئرلیگده حاضیرایدی و یاریشمالار
دورمادان اونجه ۹-اونجوایدی. بۇ ایلده ایران ایسلام اینقیلابی باش
توتدوغوندان یاریشمالار دوردورولدو .
بۇ کوماندا ۱۹۷۸ – اینجی ایلده (۱۳۵۶ ه.ش) حذفی جام دا فینالا چاتدی آنجاق
ملوان بندر انزلی کومانداسینین اونونده اوتوزوب و ایکینجی یئری توتدو.
۱۳۶۰ ایل‌لرینده
۱۳۶۰-اینجی ایللرده ایران لار عیراق آراسیندا دویوش باشلاماق‌لا،
ایرانین سوپئرلیگی تعطیل اوْلدو و تکجه اوستانی یاریشمالار کئچیریلیردی. او
زامان‌لار تراختور تبریزین فوتبال لیقاسیندا اوْیناییردی. ۱۹۸۷-اینجی
ایلده (۱۳۶۵ ه.ش)، تراختور و ماشین سازی فوتبال کلوبلارینین
اویونچولاریندان تشکیل اوْلونان دوغو آذربایجان اوستانینین کومانداسی، اوستانی فوتبال اویونلاریندا فینالا چاتدی، اوتوزوب ایکینجی اوْلدو. او ایللرده احد شیخلاری،
حوسئین قوی فکر، قولام‌ریضا باغ‌آبادی و امیرداداش ضیایی تراختورون آدلیم
اویونچولاریندان‌ایمیش‌لار. بۇ اویونچولار ایرانین میلّی فوتبال
کومانداسیندادا اوْیناییردیلار. بۇ ایللرین سوْنوندا واسیلی قوجا،
رومانیالی مشقچی‌سی تراختورا گلدی .
۱۹۹۰ (۱۳۷۰) ایل‌لری و ۲۰۰۰ (۱۳۸۰) ایل‌لرینین اولی
واسیلی قوجا، تراختورون پایه کوماندالارین نظارت آلتینا آلدی و کلوبون اساس
ایشلرینه خیدمت ائتدی. تراختور ده‌ییشیلدی و اوغورلو ایللر کئچیرددی..
اونلارین ایرانین سوپئرلیگینده بیرینجی قوروپ‌دا ایستیقلال و کیشاورز
کومانداسیندان اوسته بیرینجی اوْلدولار، آنجاق پلی آف اویونوندا پاس
کومانداسینا اوتوزوب اوچونجو اوْلدولار
. بۇ سونوج، تراختورون ان بویوک اوغورو ساییلماقدادیر. بۇ ایللرده کریم
باقیری، سیروس دین موحممدی و حوسئین خطیبی تراختورون اویونچولاری‌ایمیش‌لر.
ایسماعیل حیلالی و علی باغمیشه بۇ کوماندادان ایرانین میلّی فوتبال
کومانداسینا یول تاپدی‌لار. ۱۹۹۵-اینجی ایلده (۱۳۷۳)، تراختور جام
حذفی‌نین فینالینا ایکینجی دفعه اولاراق یول تاپدی، آنجاق بهمن
کومانداسینین اونونده اوتوزوب ایکینجی اوْلدو. بۇ ایلدن سوْنرا کوماندانین
کیلیدی اویونچولاری کوماندادان گئتدی‌لر و بئله‌لیک‌له کوماندانین
ضعیف‌له‌مه‌سی باشلادی. موحممد حوسئین ضیایی، قوجانین یئرین تۇتدو و
کوماندانین اویونچو-مشقچی‌سی اوْلدو. تراختور ۲۰۰۱– اینجی ایلده (۱۳۷۹)،
لیگده سوْنونجو اوْلدو، بونا باخمایاراق ایرانین فوتبال فئدراسیونونون
حوکموایله، سوپئرلیگده قالدی. تراختور ۲۰۰۳-۲۰۰۲(۸۱-۸۰) ایلینده
ریضاوطنخواه و ماحمود یاوری نین مشقچی‌لییی‌له یئنیدن لیگده سوْنونجو
اوْلدو و آشاغا دسته‌یه سقوط ائتدی .
بیرینجی دسته‌ده اولان ایللر: ۲۰۱۰-۲۰۰۳(۱۳۸۸-۱۳۸۱)
تراختور یئددی مووسومو ایران فوتبالونون بیرنیجی دسته‌سینده کئچیرددی و ائلییه بیلمه‌دی سوپئرلیگده اویناسین. تراختور بۇ یئددی ایلده، تکجه بیر سئری پلی‌آفا چاتدی و شیرین فراز کیرمانشاه کومانداسینا اوتوزماق‌لا سوپئرلیگه قالخا بیلمه‌دی. بۇ ایللرده ائرنئست میدئندروپ، فرشاد پیوس و احد شیخلاری تراختورون باش مشقچی‌سی‌لریندن اوْلوب‌لار. سوندا فراز کمالوند ۲۰۱۰-۲۰۰۹ (۸۸-۱۳۸۷ ه.ش) مووسومونده تراختورو سوپئرلیگه قایتاردی .
سوپئرلیگه قالخماق
تراختور ۸۸ – ۸۷ مووسومو ایران فوتبالونون بیرنیجی دسته‌سینده اوینایان سوْنونجو اویونوندا ۱۵.۰۰۰ یانداش‌ین حوضورویلا ائلیه بیلدی آلومینیوم-ی هورموزگان کومانداسین ۲ قول‌لا اوتا و ۵۴ خال‌لا موستقیم صورتده ایرانین سوپئرلیگینه قالخا. بۇ ایلده ناصیر شفق تراختورون پرئزیدئنتی و فراز کمالوند بۇ کوماندانین باش مشقچی‌سی ایدی. بۇ اویوندا تراختورون قول‌لارین امیر موحیببی و مسعود ابطحی وورموشدولار. او ایل شاهین بوشهر فوتبال کلوبو، تراختورون دالیجا قره به قره گلیردی و سون اویوندا ۲ هئچه دئیهیم-ی اهوازی اوتسادا ائلیه بیلمدی تراختورو قاباق‌لاسین، و تکجه پلی‌آفا یئتیشدی.
سوپئرلیگه قالخان‌دان سوْنرا
تراختور سوپئر لیگه قالخان‌دان سوْنرا اول ایلده (ایرانین سوپر لیگینین ۹-اونجو دوررو) یئددینجی
و ایکینجی ایل (ایرانین سوپر لیگینین ۱۰-اونجو دوررو) بئشینجی روتبه‌نی
قازاندی. همین ایل تراختور کومانداسی اخلاق ساری‌دان ان یاخشی کوماندا
سئچیلدی .
یانداشلار
تراختورون یانداشلاری ایران فوتبال کلوبلاری یانداشلاری آراسیندا ان چیلغینلاری ساییلیرلار. حاضیردا بۇ کلوب ایراندا یاشایان تورک‌لرین کیملیک موباریزه‌سینین سیمووللاریندان بیرینه چئوریلیب‌دیر. کلوبون یانداشلاری سئویملی تاخیملارینا حتتا گئدیش اویونلاریندادا، تراختورون قوناغی اوْلدوغو تاخیمین ایستادییونونا آخیشماق‌لا، بویوک یاردیمچی اولورلار؛ اوزل‌لیکله تهرانین ایستیقلال و پیروزلیق(پرسپولیس) فوتبال تاخیملاری‌لا گئدیش اویونلاریندا، تهرانین ۱۰۰ مینلیک آزادلیق ایستادییونونا توپلاشان یانداشلارین ان آزی یاریسی تراختورو آلقیش‌لاییر.
ایراندا فوتبال ایستادیومونا تاماشاچی توپلاماق رئکوردودا تراختورا مخصوص‌دور. ایرانین یوکسک فوتبال لیقاسینین اویونلاری چرچیوه‌سینده تراختورون تبریزین دوغما سهند ایستادیوموندا شیرازین موقاویمت سیپاسی فوتبال کلوبونا قارشی کئچیردیگی اویوندا استادیومونون توتوموندان داها آرتیق یانداش گلیب و بعضی قایناقلارا گوره، سایی ۱۱۰میندن ۱۵۰مین آراسی اوْلان بۇ یانداشلار، اوز دوغما تاخیملارینی حتتا قیراغداکی تپه‌لرین اوستونه چیخاراق، آلقیش‌لاییبلار. تبریزین سهند ایستادیومونون (یادیگار ایمام) بۇ تاخیمین هر اویونونا تاماشا ائتمک اوچون، اورتام دورومدا ۶۰مین نفر یانداش توپلاشیر. رسمی آمارلار اساسیندا تراختور یانداشلاری ۱۳۸۷-۱۳۸۸و۱۳۸۹-۱۳۹۰ اینجی ایلده ایران تاخیملاری آراسیندا ان چوخ تماشاگرلی تاخیم تانیندی.
قادین یانداشلار
ایراندا قادینلارا فوتبال اویونلارینا تاماشا ائتمک اوچون ایستادیوما گئتمک قاداغان‌دیر. بهانه کیمی ایستادییوملاردا کیشی فوتبال یانداشلارینین بعضن اخلاق‌دان کنار یامانلار سسلندیرمه‌سی گؤسته‌ریلیر. آنجاق تراختور یانداشلارینین ایران فوتبال کلوبلاری یانداشلاری آراسیندا همده ان نظملی-اینتیظاملی یانداشلار ساییلیرلار. بونا گوره‌ده کلوبون قادین یانداشلاری ایستادییوما گیرمک قاداغاسی اوْلدوغونا گوره، سئویملی تاخیملارینی اویونلارینا ایستادییون اطرافینداکی تپه‌لرین اوزرینه چیخاراق، تاماشا ائدیرلر. آمّا بۇ عنعنه‌نین باشقا شهرلرده‌ده یاییلاجاغیندان تشویشه دوشن پولیس، سون واختلار بونا قارشی جیددی موباریزه آپاریر؛ حتتا تاخیمین بیر نئچه قادین یانداشی حبس ائدیلمیش و اونلاردان بیر داها فوتبال اویونلارینا تاماشا ائتمک اوچون اطراف تپه‌لره قالخمایاجاقلاری حاققیندا ایلتیزام آلیندیغدان سوْنرا، آزاد بوراخیلمیشلار.
شوعارلار
فوتبولدان اوستون شوعارلار
تراختورون یانداش‌لارینی بعضن ایسپانییانین کاتالونییا اوستانینین بارسئلونا فوتبول کلوبونون یانداش‌لاری‌له موقاییسه ائدیریرلر. کاتالان دیلی ایسپانییادا قاداغان اوْلوندوق‌دان سوْنرا، بارسئلونانین یانداشلاری بۇ تاخیمین هر ائو اویونوندا دوغما نییوکامپ ایستادییونونا آخیشاراق، کاتالانجا میلّی شوعارلار سسلندیرمه‌یه باشلامیش‌لار. حاضیردا ایران تورک‌لریده هم تراختورون همده تبریزین باشقا فوتبال کلوبلاری —بلدییه و گوستریش پولاد اسپور فوتبال کلوبولاری-نین ائو اویونلاریندا ایستادییون‌لاردا میلّی شوعارلار سسلندیریرلر. تراختورون یانداشلارینین تئز-تئز سسلندیردیکلری بعضی شوعارلار بونلاردیر:
- یاشاسین آذربایجان.
- یئل یاتار، توفان یاتار، یاتماز تراختور بایراغی.
- آذربایجان وار اولسون، ایسته‌مه‌یه‌ن خار اولسون.
- آذربایجان یوردوموز، تراختور بوزقوردوموز.
- تورک دیلینده مدرسه، اولمالی‌دیر هر کسه.
تهراندا کئچیریلن اویون‌لاردا بعضن تهران کلوبلارینین یانداشلارینین تورک‌لره قارشی سسلندیردیکلری ایریقچی شوعارلارا تراختور یانداشلارینین وئردیک‌لری جاوابین نتیجه‌سینده، تبریز تاخیمی جزالاندیریلیب و ائو اویون‌لاری‌نین بیر نئچه‌سینی یانداش یاردیمی اولمادان، تاماشاچیسیز ایستادییوندا کئچیرمه‌لی اوْلوب‌دور.
فوتبولا جوشغو قاتان فرقلی شوعارلار
- تیراختورون غلبه قازانماسیندان و یا مغلوب اولماسیندان آسیلی اولمایاراق، اونلار سئویملی تاخیملارینی آلقیش‌لاییرلار. حتتا تاخیم اوزو قول یئیه‌نده استادییوندا "عئیبی یوخ، عئیبی یوخ" سسلری ائشیدیلیر.
- جوشغو و هیجان قالخدیقجا ، و تیم سالدیریب قولا یاخینلاشاندا دئییرلر: "تیراختور حمله ائله، جیریخ یئرین تاپمیسان".
- تیراختورا داها جوش جوشغو وئرمک ایچین، "هئی هئی" دئییلیر.
- تیراختور یانداشلاری هر قونودا باشقا تاماشاچیلارلا فرقلی دیرلر. رقیب تاخیم اویونچولاری واخت کورلایاندا، یئره اوزانیب اؤزلرینی مصدومیته ووراندا، دئییرلر: "عئشقعلی تابوت گتیر، ائششک اؤلوب تئز گتیر".
اورمو گؤلو
تراختورون یانداشلاری تکجه اوز دوغما تاخیملارینی آلقیش‌لاماق‌لا کیفایتلنمه‌ییب، آذربایجانین بوتون توپلوم‌سال سورون‌لاری‌نا اوز موناسیبت‌لری‌نی بیلدیرمه‌یه، حاق‌سیزلیق‌لارا قارشی ائعتیراض سس‌لرینی اوجالتماغا چالیشیرلار. حاضیردا بئله سورون‌لاردان بیری، گونئی آذربایجانین سیمووللاریندان بیری ساییلان اورمو گؤلونون گئت-گئده قوروماسی‌دیر. تراختورون ۱۳۸۹اونجو ایلینده کئچیردیگی ائو اویون‌لاری‌ندان بیرینده ایستادیوم‌دا "اورمو گؤلو سس‌له‌نیر، سوسوزام هارای هارای" شوعاری سس‌له‌ندی. بونون نتیجه‌سی اولاراق، ۱۳۹۰اینجی ایلین فروردین آیینین اون‌اوچونده تبریزدن، اورمودان و گونئی آذربایجانین دیگر بؤلگه‌لریندن اوْلان یوزلرله تراختور یانداشی‌نین هر بیری اورمو گولونون اوستونده‌کی کورپودن گوله بیر قاب سو توک‌دولر. بوندان سوْنرا اورمو گؤلونه گلن هر بیر آدام جیددی پولیس یوخلانیشیندان کئچیریلیر و بعضی معلومات‌لارا گؤره بۇ گونه‌جن بۇ کامپانییایا قوشولماق ایسته‌یه‌ن ۱۰۰دن آرتیق تراختور یانداشی مووققتی گؤز آلتینا آلینیب‌دیر.
مارشلار
تراختور ایراندا اوزونه مخصوص مارش و ماهنیلاری اوْلان ایلک فوتبال کلوبلاریناندی. بۇ مارشلاردان "باریش کور قوروپو"نون یازیب ایفا ائتدیگی "یاشا، یاشا تراختور" ماهنی‌سی فوتبال کلوبۇ طرفیندن رسمی مارش کیمی قبول ائدیلمیش‌دیر
| ظفر مارشین چالان بیزوق | دونیا بویی قالان بیزوق | |
| قهرمانلیق بیزیم کی دیر | ایرانا باش اؤلان بیزوق | |
| آذربایجان دیاریمیز | تیراختور ایفتیخاریمیز | |
| ادب، شرف شوعاریمیز | تیراختور ایفتیخاریمیز | |
| بیرلیق گوجون اینانمشوق | داغلار کیمی دایانمیشوق | |
| چؤخ میدانلار دؤلانمئشوق | ایفتیخارلار قازانمیشوق | |
| آذربایجان دیاریمیز | تیراختور ایفتیخاریمیز | |
| ادب، شرف شوعاریمیز | تیراختور ایفتیخاریمیز |
